روايـــــه .. لاقلـــــت أحبــــك إسـكتـــي وإحــضنــيني ..

عبدالعزيز متعود عالإضافات قبل الإضافه
كان نكه..
ضـــمــنـــي ليـــن تـسـمـع للمـــحــاني ونــيـــــن
وأما لميس نكها..
بعض الرجال ان ماغسلتي شراعه لا ماتبرد حرتك فيه سكين

بعض الرجال ان ماغسلتي شراعه لا ماتبرد حرتك فيه سكين :
سلام
((عبدالعزيز قرا النك وفطس ضحك اكيد بنت مو ولد))
ضـــمــنـــي ليـــن تـسـمـع للمـــحــاني ونــيـــــن:
وعليكم السلام ... مين؟
بعض الرجال ان ماغسلتي شراعه لا ماتبرد حرتك فيه سكين :
انا بنت ابوي
ضـــمــنـــي ليـــن تـسـمـع للمـــحــاني ونــيـــــن:
تستهبلين؟؟ من انتي خلصيني
بعض الرجال ان ماغسلتي شراعه لا ماتبرد حرتك فيه سكين :
انت من؟
ضـــمــنـــي ليـــن تـسـمـع للمـــحــاني ونــيـــــن:
بتقولين لي ولا بلوك وديليت
بعض الرجال ان ماغسلتي شراعه لا ماتبرد حرتك فيه سكين :
افااا..ليش؟؟ انا اسمي لبنى
ضـــمــنـــي ليـــن تـسـمـع للمـــحــاني ونــيـــــن:
شوفي يابنت الناس انا رجال مو فاضي لخرابيطك عندي دراستي وشغلي عن اذنك
بعض الرجال ان ماغسلتي شراعه لا ماتبرد حرتك فيه سكين :
لحظه لحظه بقول لك شي
ضـــمــنـــي ليـــن تـسـمـع للمـــحــاني ونــيـــــن:
ولا تقولين ولا اقول .. عن أذنك
بعض الرجال ان ماغسلتي شراعه لا ماتبرد حرتك فيه سكين :
حتى لو كان هالشئ عن وريف؟؟
((عبدالعزيز قرا وريف وبلم))
ضـــمــنـــي ليـــن تـسـمـع للمـــحــاني ونــيـــــن:
وش فيها وريف؟؟؟
بعض الرجال ان ماغسلتي شراعه لا ماتبرد حرتك فيه سكين :
مافيها شي تسلم عليك
ضـــمــنـــي ليـــن تـسـمـع للمـــحــاني ونــيـــــن:
احلفي.. تسلم علي؟؟؟
بعض الرجال ان ماغسلتي شراعه لا ماتبرد حرتك فيه سكين :
وش تبي بها انت؟؟؟ مو حرام عليك تلعب بمشاعرها؟؟؟
ضـــمــنـــي ليـــن تـسـمـع للمـــحــاني ونــيـــــن:
انتي من بنات عمها؟؟؟؟
’,
’,
اما وريف كانت ضايقه فيها الدنيا
يمكن انها خسرت عبدالعزيز.. بس الاكيد انها ارتاحت من شعور تأنيب الضمير..
يمكن عبدالعزيز يكذب؟؟
اللي يكذب مره يكذب الف مره..
بس انا تعلقت في اسيره الذكريات..
افففف ياربي ارحمني
’,
ام وريف كانت حالتها الصحيه موش ولابد اخر يومين تعب بنتها والدوا مافيه احد يعطيها اياه.. واخوها اللي المفروض يكون واقف معها صدق اكاذيب زوجته وقال ان وريف غلطانه..
شادن اللي تعبت من التفكير قررت تقاطع وريف.. بنت العمه بدالها بنت بس الام ما بدالها أم
زياد تايه مابين خواته وامه.. كل وحده متخذه موقف سلبي.. وعنده مبارات نهائي الأسبوع الجاي.. وشلون ابلعب وانا فكري مشغول..مستحيل أقدر أركز..
الله يستر

لمياء: لميسوه انتي مقتنعه باللي قاعده تقولينه؟؟
لميس:انا ادري انه غلط بس هو يترجاني يعرف اهل وريف عشان يخطبها
لمياء:ويمكن انه يبيها عشان يفضحها؟؟
لميس: يالمو والله كلامه مقنع وحلف لي بالله انه صادق
لمياء: لا يكون قلتي له؟؟
لميس: لا قلت له مستحيل اقولك شي خاص ببنت عمي من غير إذنها
لمياء: ووريف وش ردة فعلها؟؟
لميس: يقول مواقفها كلها سلبيه.. ماترضى حتى تتناقش معي بأي شي
لمياء: يستاهل من قال له يكذب عليها من الأساس
لميس: لمو طلبتك لا تبينين لوريف انك عارفه أي شي


طق باب غرفة وريف
وريف: تفضل مين؟؟
دخل عمها خالد ومعاه باقة ورد حمرا حطها عند راسها وباس راسها
وريف: هلاعمي شلونك
ابو عبدالرحمن مبتسم: بخير يابنيتي انتي وشلونك؟
وريف: انا بخير الحمد لله نور المستشفى
ابو عبدالرحمن: يابنتي انا جاي ابقولك ان جناحك انتي وامك جاهز
وريف: جناح؟؟ وش جناحه
ابو عبدالرحمن: انا ما ارضاها على بنت عبدالرحمن انها تنهان
وريف : انهان؟؟؟ شسالفه
ابو عبدالرحمن: انا عارفن كل شي.. واخرتها سالفة المويه الحاره.. مايجوز تقعدين بعيد عن بيت ابوك وحلالك
وريف بحسره: وأمي؟؟؟
ابو عبدالرحمن: امك بعيوننا نخدمها وشغالتكم توصل بكره عشان ترعى أمك
وريف بإبتسامة رضى : اللي تشوفه ياعمي
ابو عبدالرحمن: ولميس ولمياء بيروحون الليله لبيت خالك يجهزون عفشك وعفش امك
وريف دمعت : الله لايحرمني منكم
ابو عبدالرحمن اتصل على عبدالرحمن يودي خواته لبيت ابو زياد
ركبو عبدالرحمن ولمياء بالسياره واتجهو لبيت عمهم ماجد عشان ياخذون لميس
ركبت لميس: السلام عليكم
عبدالرحمن+لمياء: وعليكم السلام
لميس: شلونك يالمو
لمياء: ولا أحلى
عبدالرحمن: وانا مالي ابو؟؟
لميس: هههههههههههه شخبارك؟
عبدالرحمن: عال العال.. الا اقول يابنات
لميس+لمياء: نعم
عبدالرحمن: ابخطب لي وحده تتوقع ترفضني؟؟؟
لميس ولمياء طرت على بالهم مها
لميس انصدمت.. ضاق صدرها
لمياء: ومن اللي داعيه عليها أمها؟؟
عبدالرحمن: وحده ماتعرفونها
لمياء: واااي وناسه بيصير عرس قبل وتين وفهد
عبدالرحمن: تتوقعون ترفضني؟؟
لمياء: بلا في شكلها وشوله ترفضك؟؟؟ تاج راسها وراس اهلها بعد
عبدالرحمن: لاتغلطين عليها.. تميس هاه وش رايك؟؟
لميس بصوت مبحوح: الله يوفقك تستاهل كل خير
لمياء: ههههههههههههه حلوه تميس
عبدالرحمن: هذا تركي مايتعامل الا بالعيشه
عبدالرحمن+لمياء: ههههههههههههههههه

وصلو البيت ونزلو لمياء ولميس اللي كانت شبه مكسوره.. هي صح ماعمرها حبته او فكرت فيه غير بالمقالب.. بس اللحين تحس بالغيره.. وشلون عبدالرحمن يتزوج وحده ثانيه.. كنت اعتقد ان اهتمامي فيه بس عشان ارد له المقالب بس الظاهر اني احبه.. كان اول شخص يطري علي عبدالرحمن.. بالروحه والجيه..
حتى يوم صار له حادث قبل سنتين كنت ابموت من الخوف عليه .. يوووه ياغبائي..
لمياء: يؤيؤيؤ ياالاخت وين وصلتي؟
لميس: هااه لالالا ولا شي خلينا ندخل بس
دقو الجرس وفتحت لهم شادن اللي كانت ملامحها جامده
لميس ناظرت فيها من فوق لتحت ودخلت البيت.. اما لمياء تفشلت من حركة لميس وسلمت على شادن اللي ماردت ولا بكلمه..
دخلو داخل شافو ام وريف بالصاله كان وجهها تعبان
لميس: هلا خالتي شلونك؟؟؟
ام وريف : بخير الحمد لله
لمياء: علامه وجهك تعبان؟؟ عسى ماشر
ام وريف تضحك: هههه هذا من غياب الضنى
لمياء تحضن ام وريف: ربي لايحرمها منك
لميس: نستأذنك ياخاله نبي نجمع عفشك وعفش وريف عمي خالد يقول بكره وريف تطلع من المستشفى
ام وريف: وشلون اسكن معكم؟؟؟ عيب يابنتي؟
لمياء: وش اللي عيب؟؟؟ البيت اللي حنا ساكنينه لوريف نسبه فيه ولك بعد لأنكم ورثة عمي عبدالرحمن الله يرحمه
ام وريف: بس
لميس: ولا بس ولا شي انتي وبنتك ساكنين بحلالكم
ام وريف: زين اللي تشوفونه

طلعو لميس ولمياء لمو العفش خلال نص ساعه كانت ثلاث شناط لوريف وشنطه لأم وريف تحت بالصاله
لميس: يالله ياخالتي بكره نشوفك على خير
ام وريف : زين يابنتي

بهاللحظه انفتح الباب دخلت ام زياد تناظرهم من فوق لتحت
لميس تخصرت
لمياء بهمس: هدي يالميس
لميس: امنية حياتي اعطيها كف اعدل ملامح وجهها
ام زياد تناظر بالشنط وتناظر بام وريف وقالت بقرف: على وين ان شاء الله
وقبل ترد ام وريف ردت لميس بإستهزاء
لميس: وانتي من تكونين عشان تسألين..
لمياء شدت على يد لميس عشان تهدا
ام زياد: تدرين انك اوقح انسانه عرفتها بحياتي
لميس بأسلوب سخريه: وتدرين انك اغبى عجوز عرفتها بحياتي
لمياء ما مسكت ضحكتها وفطست من الضحك
ام زياد من القهر صرخت: عجوز بعينك ... دامك بنت عم الـ... اكيد بتصيرين مثلها
ام وريف بقهر : الله يقطع لسانك بنتي أشرف منك
لميس حست بالقهر يرجفها رجف راحت عند ام زياد ومسكتها من كتوفها
لميس وهي تصر على اسنانها : اقسم بالله ان عدتي هالكلمه على تاج راسك وريف لا تلومين الا نفسك يالخايسه يابنت الشوارع

طلعو لميس و لمياء من البيت معصبين ركبو مع عبدالرحمن

ام زياد كانت تناظرهم ايلين اطلعو من البيت وراحت جهة ام وريف وصارت تناظرها بإستعلاء
ام زياد: وين بتهفون؟؟
ام وريف اللي مالها حيله: بنروح لأعمام وريف
ام زياد: روحه بلا رجعه مابغيتو
وطلعت مع الدرج لغرفتها وام وريف تلاحقها بنظرات الحقد وتتحسب عليها من داخلها
اما وريف اللي كانت تخطط لحياتها في بيت أعمامها..
يااااه اشكثر ابستانس مع لمياء.. واذا جات لميسوه اكيد وناستنا بتزيد .. يارب لك الحمد.. عوضت صبري خير
بهاللحظه دق جوال وريف
ناظرت بالاسم.. اسم فجر
وريف: اهلييييييييييين
فجر: هلا فييييييييك
وريف: وحشتيني يادوبهـ
فجر: هههههههه شخبارك؟؟ وانتي اكثر
وريف: بخير بس من جد واحشتني .. كيفك انتي؟ وكيف الدراسه
فجر: ويييييع .. الا على طاري الدراسه وش بتسوين؟؟
وريف: يابنت الحلال تشوفيني هالكورس اغلبه غيابات قلت ابعتذر احسن
فجر: اجل انا اروح ازين اوراق الاعتذار
وريف: الله يجزاك خير
فجر: اممم طيب قلبي تامريني بشي؟؟
وريف: لا تقفلين .. احس روحي ضايقه ابي اسولف معك
فجر: غصب والله بروح اسوي لهم عشاء
وريف: يوووه طيب بالعافيه
فجر: باي حبوبه
وريف بزعل: باي

قفلت فجر ونزلت لهم تحت عشان تسوي العشاء.. واما وريف تغصبت على النوم ايلين نامت ..
سلمان: هلا والله بـ فجر
فجر مبتسمه: هلا بالغالي..يااااااه متى يرجع عزوز الشين وحشني
سلمان: ههههههههههه يعني انا ما أسد اللزوم
جوري: الا انت الكل بالكل..((وخنقتها العبره)) سلماني اذا تزوجت لا تنسانا
سلمان: افااا انساكم؟؟ انا لونسيتهم كلهم ما انسى بنتي حبيبتي جوري
ام سلمان: الا على طاري العرس كلمتي رفيقتك يافجر؟
فجر تناظر بسلمان وتبتسم: لا والله يايمه تعرفين ظروف هالأيام تفشلت أكلمها بهالموضوع
سلمان: اقول لا تأخرونا تراي مستعجل صاير فاضي هالأيام
جوري ماشافو الا غبارها .. سلمان مافهم تلميحات جوري برفضها لهالعرس اللي ممكن يغير سلمان عليهم
سلمان: وش رايكم نتصل على عبدالعزيز اللحين؟؟
ام سلمان: لا ياوليدي يمكن يكون نايم ولا شي
فجر: حتى لو نايم يصحى لا اختبارات ولا شي
سلمان طلع جواله واتصل على عبدالعزيز
عبدالعزيز: هلااااا بأغلى الحبايب
سلمان: هلا بك ياابوي شلونك؟
فجر: عزوز متى ترجع ؟؟
عبدالعزيز: هلا حبيبتي شلونك؟؟ انا مانيب راجع هالشهر ذا يمكن الشهر الجاي
ام سلمان: ليش ياولدي تفطر قلبي عليك
عبدالعزيز عورت قلبه امه بس لازم يكمل المقلب: هلا هلا يمه جعل عيني ماتبكيك وشلونك
ام سلمان قامت تبكي: ليش ماتبي ترجع ياولدي؟؟؟ ليش ماتبي ديرتك؟؟
عبدالعزيز: يمه الله يهديك وانتي كل ما كلمتك نكدتي علي وقمتي تصيحين .. انا اباخذ شهادتي وارجع
فجر: اذا تبي تلحق على عرس سلماني تعال ما تبي اقعد براحتك
عبدالعزيز بفرحه: لالاه من جد؟؟؟؟ قللللللللووووووش مبرووووووك يالغالي
الكل: هههههههههههههههههههههههههههههههههههههه
سلمان: الله يبارك بك عقبالك
عبدالعزيز: افااا وانا اخر من يعلم
فجر: لالا حرام عليك تراه للحين ماخطبنا بس فيه نيه
عبدالعزيز: عالبركه ان شاء الله.. الاوين جوري ما اسمع حسها؟؟
سلمان: فوق بغرفتها
عبدالعزيز: اجل سلمو لي عليها .. وادعو لخويي فيصل يقبلون اعتذاره عن هالكورس
سلمان: ليش؟؟
عبدالعزيز: تعرف من يوم جاء بريطانيا وحنا مع بعض .. واللحين انا ابرجع واخليه وماهو مستوعب يدرس بلحاله فديتني بس
الكل: هههههههههههههههههههه
سلمان: اجل يابوي سلم لي عليه وقله يستخير قبل يعتذر
عبدالعزيز: ان شاء الله تامروني شي؟
الكل: سلامتك

قفل عبدالعزيز ناظر بالساعه 7 الصبح فتح دولابه يبي يلبس طاحت عينه على الثوب أخذ الثوب صار يتأمله.. اااااه ياريحة بلادي متى أرجع والبسك
حط الثوب على جنب ولبس له تيشيرت رصاصي وبنطلون جنز اخذ بوكه ودقلته ونظارته وناظر بفيصل اللي كان بسابع نومه وطلع وقفل الباب وراه ونزل للسوق
كان يلفلف بين المحلات محتار وش يختار لخواته ..أول شي جوري العنيده..
اممم المصيبه ذوقها صعب
شاف سلسله لونها عودي ناعمه تناسب رقبة جوري الطويله اختار معها حلق نفس الشكل وخاتم وطاحت عينه على طقم بنطلون وبلوزه لونه بيج وفيه تطريز عودي بدون تفكير طلب مقاس سمول وأخذه لجوري
اما فجر.. قنوعه وترضى بأي شي وهذا اللي يتعب..
لفت انتباهه عطر نسائي شكله نعوم
طلب يشم العطر .. حس انه انوثي بقووووه .. مايدري ليش تذكر وريف بهاللحظه.. ابتسم على نفسه
اختار العطر واختار معه نظاره شمسيه إطارها ملبس من جلد النمر
وشاف شنطه لليد جلد اخذها لها
باقي سلمان وامي ان شا الله من الرياض اشتري لهم هنا مافيه شي ينفع لهم ابدن ابد
رجع البيت عالساعه 11 ونص شاف فيصل يسوي الغداء
فتح الماسنجر وارسل ايميل لوريف
((سلام عليكم وريف
الظاهر ربي مو كاتب لي الفرحه
انا ماراح ادخل النت ابد..
انتي طيبه وتستاهلين كل خير
الله يرزقك باللي يستاهلك.. تأكدي اني ماحبيت ولا راح أحب الا وريف
اتمنى تسامحيني عاللي صار مني
اخوكـ/عبدالعزيز))

اليوم الثاني
صحت وريف على الساعه 10 ونص من رنة الجوال
ناظرت بالشاشه
لميس يتصل بك
وريف: هاااه يالمزعجه؟؟
لميس: الله يرج ابليسك قومي يالله اللحين بنجي ناخذك ونمر على أمك
وريف صحصحت: خلاص عطوني نص ساعه اجهز
لميس: مافيه غير 10 دقايق بس لي ساعه اتصل لك
وريف: زين زين باااي

قفلت وريف وقامت بسرعه لمت اشيائها البسيطه ولبست عباتها تنتظرهم
جات لميس ولمياء وعبدالرحمن وابو عبدالرحمن
لميس أخذت شنطة وريف
ولمياء ساعدت وريف تنزل
ابو عبدالرحمن ينتظرهم بالسياره
عبدالرحمن: راح يخلص اوراق وريف عشان تطلع من المستشفى
خمس دقايق والكل كان بالسياره
وريف : سلام ياعمي
ابو عبدالرحمن: هلا وغلا بريحة الغالي
وريف: شلونك عبدالرحمن
عبدالرحمن: بخير عساك بخير

حركو السياره متجهين على بيت ابو زياد اللي من يوم طاحت وريف بالمستشفى ما كلف على نفسه يتطمن عليها حتى لو بالسؤال
اول ما وقفت السياره نزلت وريف شبه تركض فتحت الباب اللي كان مفتوح ودخلت شافت بالصاله امها جالسه وجنبها شادن يتقهوون شاهي
وريف طارت على حضن امها تبوس يدينها ورجولها
وقالت وهي تبكي: وشلونك يمه فقدتك والله
ام وريف من الفرحه ببنتها : قومي يابنتي ابشوفك قومي وشلونك؟؟
وريف قامت تمسح دموعها بكم عبايتها : انا بخير انتي وشلونك ؟؟ هاه يمه جاهزه؟؟ عمي خالد برا بياخذونا
: هلا وغلا بنور البيت

كان هذا صوت زياد اللي نازل بيروح النادي
وريف طارت لأحضان اخوها متجاهله وجود شادن
وريف: هلا زياد شلونك شخبارك؟؟
زياد: انا بخير .. الا من جد عمك برا؟؟
وريف: ايه برا
زياد: افاا ورا مادخلتيه؟؟
وريف: لالا هو مستعجل بياخذنا ويمشي
زياد بإستغراب: ياخذكم؟؟؟ وين؟
ام وريف: لبيته امس اخذو الشناط واليوم بنروح
زياد عصب: ومن سمح له؟؟
وريف انصدمت: ايش؟؟؟
زياد مارد على وريف ونزل من جنبها متجاهل ندائها له وطلع وهو راكبه مليون جني
زياد وصل لسيارة عبدالرحمن
زياد: سلام عليكم
ابو عبدالرحمن+ عبدالرحمن: وعليكم السلام
لمياء تخدرت كالعاده.. لميس تضحك على لمياء
زياد: صدق اللي سمعته؟؟؟
ابو عبدالرحمن: وش اللي سمعته؟؟
زياد: انكم بتاخذون وريف وعمتي؟
ابو عبدالرحمن: ايه ياولدي
زياد: مايصير البنت تترك بيت اخوها وتروح لبيت اغراب
ابو عبدالرحمن: وش اغرابه ؟؟؟ حنا عمانها ولا نسيت
زياد: عمانها ... متى عرفتوها؟؟؟ وينكم عنها كل هالسنين
عبدالرحمن عصب: واخوها وينه عنها يوم تشوهت بالمويه الحار
زياد صرخ: اختي وعمتي مابيطلعون من بيتي
لميس نطقت: قصدك بيت امك ... امس ماخلت كلمه وحده ماقالتها على وريف...وراك ماحافظت على كرامة اختك ؟؟؟
زياد: ماتعودت ارادد حريم .. ومالهم طلعه عمتي واختي
لميس بقهر : الحريم هم اللي ردو كرامة وريف
عبدالرحمن بهدوء: بس يالميس
ابو عبدالرحمن نزل من السياره وقال بلهجته المرعبه: وريف بتجي معنا غصب ولا طيب.. بالرضا ولا بالمحاكم هذا بيت ابوها
زياد: وين الوثائق اللي تثبت ان هذا بيت ابوها؟؟ وان ابوها له نصيب بالبيت
ابو عبدالرحمن: ماهي عندي.. بس المهم ان وريف بتجي معنا بالغصب ولا بالطيب
زياد: وريف ماراح تخلي بيت اخوها
: الا يا زياد ابي اروح معاهم
كان هذا صوت وريف طالعه من البيت ومعها امها تدفها عالكرسي
زياد انلخم: وريف مايصير
وريف بتبكي: اجل وش اللي يصير انها تذبحني امك وانتو تتفرجون لا اختك ولا حتى ابوك اتصل علي يتطمن علي
زياد : وريف اقصري الشر وادخلي داخل
وريف : ابروح مع عمي
زياد بقهر : اوكي بتروحين .. باللي يحفظك وبيتنا يتعذرك.. بس عمتي على جثتي تطلع
وريف: يعني شلون؟؟ تحرمني من امي
زياد: انتي وعلى قولتك بتروحين مع اعمامك.. لكن عمتي بتروح لمن
سحب زياد عمته عالكرسي ودخلها داخل البيت وسط صرخ وريف اللي مسكها عمها وهداها
ابو عبدالرحمن: تطمني يابنتي وعد مني كلها يومين وتجيك امك بس انتي ارتاحي
وريف تصارخ: يمااااااااااااااااااه
نزلت لمياء اللي تحطمت صورة زياد في عينها ..
نزلت وحضنت وريف تهديها وركبتها معها السياره
عبدالرحمن محترم ابوه ولا كان تضارب مع زياد
وصلت وريف البيت وطلعت للجناح اللي المفروض يكون لها ولأمها
ناظرت بغرفة أمها شافت الدواليب مرتبه فيها الملابس طاحت على ملابس امها تحضنها وتشمها.. زياد عنيد وبيسوي اللي براسه
ام وريف من يوم دخلت البيت وهي قلبها متفطر على بنتها .. ومقهوره من عجزها.. لو انها تقدر تمشي كان برجولها راحت لبنتها..آآآآآه يارب ساعدني
وريف قفلت على نفسها الجناح ولا رضت تفتح لأي وحده من بنات اعمامها اللي تجمعو على بابها
كانت ذابحه نفسها من الصياح
بهالوقت ركب عبدالعزيز الطياره متجه على الرياض..
وريف صار لها ثمان ساعات قافله على نفسها وبنات عمها جالسين عند الباب ولا هي راضيه تفتح لهم ولا حتى ترد عليهم ..
الدموع مو شي جديد عليها .. والخساره صارت شئ مألوف بالنسبه لها
بس الجديد انها تبكي على امها .. خسرت أمها..
وبسبب مين؟؟ بسبب اخوها زياد
حسبي الله عليك يازياد ونعم الوكيل الله يحرمك من اعز ناسك مثل ماحرمتني من اعز ناسي

كانت الساعه 7 الصبح الطياره توقفت بكذا مطار عشان كذا تأخرت
نزل عبدالعزيز وفعلا اوفى بالنذر اللي عليه من طلع من المطار نزل بكل حب وشوق للأرض يبوسها ويسجد لله شكر قدام الناس اللي يناظرونه بإستغراب
إستأجر عبدالعزيز بالفندق .. اخذ له شاور غير ملابسه .. ولبس الثوب وصار يناظر بنفسه بالمرايه بشكله بالثوب والشماغ .. يااااملحي بالثوب
صلى الظهر بالمسجد القريب من بيتهم وإتجه عالبيت
وقف التاكسي عند باب البيت ناظر بالمواقف شاف سيارة سلمان وسيارته واقفه مثل ماهي
دق الجرس
سلمان كان توه راجع من الصلاه وقاعد يسولف مع فجر بالصاله
سلمان: فجوره فديتك شوفي من اللي يدق الباب
قامت فجر وشافت شاشة الانترفون وتنحّت
سلمان: فجر مين اللي عند الباب
فجر صرخت: عزووووووووووووووووووووز
سلمان وقف على حيله ومن فرحته طلع بسرعه شاف عبدالعزيز واقف يناظر في مواقف السيارات اول ماشاف سلمان ابتسم وتقدم للباب فتح سلمان الباب واحتضن عبدالعزيز
سلمان: ايا قليل الحلا ورا ماقلت لنا
عبدالعزيز: هههههه قلت اخليها مفاجئه
سلمان : حياك حياك يابوي
اول مادخل عبدالعزيز تعلقت برقبته فجر
وجوري لمحته من اول الدرج وصرخه وحده بإسمه لين وصلت
عبدالعزيز يضحك من الفرحه بخواته
عبدالعزيز:وين أمي؟؟؟
جوري: فوق بغرفتها
عبدالعزيز لبس نظارته فجر وراح يركض مع الدرج دخل غرفة أمه شافها على السجاده تسبّح تنحنح
امه تخرعت اول ماشافته
قرب منها عبدالعزيز وباس راسها وصارت تبكي وتحمد له بالسلامهالساعه
1ونص ووريف من أمس مافتحت الباب ولا حتى ردت عليهم والبنات متناوبين عليها مره لمياء ومره شيماء ومره لميس اللي مارضت ترجع البيت ايلين تتطمن على وريف
دق جوال لمياء واللي كانت جالسه بالصاله المقابله قسم وريف هي لميس
ناظرت لميس بالشاشه شافت المتصل عبدالرحمن
ردت عليه وصوتها كان تعبان: الووو
عبدالرحمن ماعرفها استغرب الصوت: مين انتي؟
لميس: هذا انا لميس بس شوي تعبانه
عبدالرحمن: انتي تتعبين؟؟؟؟ التعب يخاف منك اصلا
لميس عصبت: عبدالرحمن ترى مو فاضيه لسخافتك يكفي هالبنت من امس ماندري هي حيه ولا ميته
عبدالرحمن: ورا ما تكسرون الباب؟
لميس: ماعندنا أحد يقدر يكسره
عبدالرحمن: البسي عباتك وانا اللحين أبطلع أكسره
لميس: طيب باي

قفلت لميس وراحت لغرفة لمياء الي مالها نص ساعه نايمه حطت جوالها عندها ولبست عباتها وراحت عند الباب تنتظر عبدالرحمن
عبدالرحمن شاف شكل لميس يالله تمشي من الهلاك
عبدالرحمن: هههههههههههههههههه والله ياشكلك نكته من النكت
لميس: اكسر الباب وتوكل على الله أقسم بالله مصدعه لي يومين ما نمت
عبدالرحمن : زين زين روحي جيب لي الساطور
لميس طلعت عيونها : ساطور؟؟؟؟ ليش؟
عبدالرحمن: ابكشخ فيه ... اجل وش ابي به ابي اكسر به الباب
لميس: ياسخافتك ياخي
نزلت لميس والدرب قدامها اسود من الصداع دخلت المطبخ وأخذت الساطور كان ثقيل عليها وطلعت لعبدالرحمن اللي كان يعافر الباب
أخذ الساطور منها وكسر الباب
عبدالرحمن: يالله ادخلي لها طمنيني انا هنا
دخلت لميس وهي مستغربه اهتمام عبدالرحمن بوريف
شافت وريف نايمه عالسرير وحاضنه ثوب امها قربت منها وشافتها تتنفس وميته من الحر ..
دورت لميس ريموت التكييف ولقته بالتسريحه شغلت لها التكييف وطلعت وهي تبكي
عبدالرحمن فز من مكانه: لميس وش فيك؟؟؟
لميس تأكدت من اللي ببالها ... عبدالرحمن أكيد بيخطب وريف .. ولا عمره إهتم بوحده من البنات زي كذا.. لميس زاد بكاها
عبدالرحمن كان شكله جدي : لميس انطقي وش فيك؟؟
لميس: مافيني شي بس وريف نايمه وشكلها تعبان.. عورني قلبي عليها
إرتاح عبدالرحمن : أحلى من متى هالمشاعر الرقيقه ههههههههههههههااااي عموما انا بروح مع الشباب كشته اذا بغيتو شي كلموني
لميس عصبت منه ماردت عليه راحت على غرفة لمياء شافت لمياء على نومها بالسرير
قعدت لميس عالكنبه حضنت نفسها .. عمرها ماحست نفسها ضعيفه كذا.. ياسبحان الله اخر شخص اتوقع انه يهمني ... صرت أحبه بدون شعور ..
سمحت لدموعها تطلع .. يمكن انها ترتاح من شعور القهر اللي فيها
ماتهنت بدموعها أذن العصر دخلت تغسل وجهها حاولت قد ماتقدر انها تخفي ملامح البكا في وجهها ..
طلعت تصحي لمياء للصلاه
لمياء: همممممم
لميس: لمو يالله قومي صلي كسرنا الباب على وريف
لمياء تخرعت: هاا .. ليش وش فيها؟؟؟
لميس: مافيها شي .. بس نتطمن عليها شفتها نايمه
لمياء: يووووه مصدعه
لميس: انا اللي بيتفجر راسي من الصداع قومي يالله نصلي ونروح لوريف
قامت لمياء وصلو البنات وطلعو لوريف
دخلو غرفتها اللي كانت مفتوحه شوي دخلت لمياء وبعدها لميس اللي كان قلبها معورها على شكل وريف
جلست لميس جنب وريف عالسرير وحطت يدها على شعر وريف تلعب فيه
اما لمياء واقفه تناظر بوريف
لميس: وريف .. قلبو قومي صلي ... ورييييييف
وريف قامت ودموعها بعينها : وين أمي؟؟؟
لميس: قومي صلي ومثل ماوعدك عمي خالد امك كلها يومين وتجي
وريف غطت وجهها بيديها تبكي بهدوء: امي يالميس أمي
لمياء: ندري والله ندري بس انتي هدي نفسك وان شاء الله بتشوفينها
وريف: ما ابي شي من هالدنيا .. مستعده ارجع لهم شغاله عندهم بس ابشوف أمي.. حتى زياد الكلب طردني من البيت
لميس ناظرت بلمياء
لمياء: هذا مايستاهل يكون أخو ..
وريف: لميس وش فيك؟؟؟؟
لميس: وش فيني؟؟
وريف: شكلك تعبان؟؟
لمياء: لميس مارضت تنام لها يومين ما نامت تبي تتطمن عليك
وريف دمعت: ياقلبييييييييي عساي ما افقدكم يارب.. مدري ليش كل ماحبيت شي راح مني
لميس انكسر قلبها على حالة وريف: لا تفاولين على نفسك
وريف : تراني صادقه..اول شي زوجي بعدين أبوي واللحين امي
لميس طيرت مخها كلمة زوجي
لمياء: انتي متزوجه؟؟؟؟
وريف ابتسمت بقهر : كنت متزوجه اللحين مطلقه
لميس: متى؟؟؟
وريف: قبل اربع سنين
لمياء بإندفاع: اييييه عشان كذا كتاباتك كلها عن اربع سنين بالمنتدى
وريف: اااه ليتني ماعرفت النت
لميس حست وريف ارتاحت لهم وقالت لهم عن سر حياتها اللي مارضت تقوله لهم من قبل..
لميس: وروفه .. بقولك سالفه
لمياء فهمت لميس : لاااااااا
وريف: وش صاير؟؟؟؟امي فيها شي؟؟
لميس: لالا تطمني والله مافيها شي .. لازم نصارحها يالمياء .. وريف وحده منا وفينا
لمياء: بس لا تزعلين مننا
وريف: اش صاير تكلمو
لميس: اوعديني ماتزعلين
وريف: اااه ماعاد فيه شي يزعلني بعد خسارة امي
لميس: انا بالصدفه قريت محادثتك مع عبدالعزيز
وريف انصفق وجهها : وين؟؟
لميس: باللاب توب .. انا عندي حفظ محادثات تلقائي
وريف مسكت راسها
لميس: وامممم وانا قررت أأدبه لأني حسيتك ماانتي طايقته وهو لازق فيك
وريف : تأدبينه؟؟ شلون؟
لميس بإبتسامه : ضفته عندي
وريف: وشهووووووووووووووووووووووو
لميس: والله ياوريف انا كنت ناويه أهزئه ..بس اصلا من عرف اني بنت كان بيحذفني ايلين قلت له اسمك هجد
وريف: ليش سويتي كذا؟
لميس: لك حق تزعلين بس سامحيني
وريف: ووش صار بعدين
لميس: اممم حسيت الرجال صادق
وريف: هذا اكبر كذاب
لميس: هو قال لي كل شي
وريف خافت : كل شي؟؟؟؟؟
لميس: بس فيه اشياء أسأله عنها مايرد علي يقول مالي حق اجاوبك
ارتاحت وريف : طيب؟
لميس: يعني اقتنعت بصدقه وصكيته بلوك اول ماخلص كلامه
وريف: لا تصدقونه هذا اكبر نصاب وكذاب
لميس: طيب اش رايك تقرين اللي يكتبه عنك.. هو مايدري انك عندنا
وريف: بس غباء الحركه
لمياء: وعلى فكره ترى مايدري الا انا وانتي ولميس حتى شيومه ماتدري
وريف: الله يخليكم لا احد يدري
لميس: انهبلتي انتي؟؟؟؟ مستحيل احد يدري
وريف: مدري عنك أخاف تروحين لعمي مثل ذيك المره
لميس: وريف لا تزعلين علي.. بس عشان مصلحتك
وريف: أي مصلحه هذي اللي تخليني أفقد أمي
لميس:................
وريف حست أنها نكدت على لميس: بس ولا يهمك عادي والله مازعلت عليك
لمياء: يالله بنات نروح نفتح ايميل لميس
لميس: يالله
قامو البنات خلو وريف تصلي وتحلقهم على غرفة لمياء اول مادخلت وريف
لمياء: قفلي الباب وراك
وريف قفلت الباب وبدت تحس بقلبها شي لعبدالعزيز .. لو ما كان يحبها كان أقل شي تكلم مع لميس وهو مايدري انها بنت عمها..
فتحت لميس ايميلها بس ماشافته اون لاين ..
لمياء: خساره
وريف: غريبه دايم مسنتر على الماسنجر خصوصا بعد ماخلص امتحاناته
لمياء: ماشاء الله تعرفين عنه كل شي هههههههههههه
وريف انحرجت: ههههههه.. طيب طيب ابفتح ايميلي يمكن ألاقي فجر .. فاقدتها لي فتره
فتحت وريف الايميل وشافت ايميل من عبدالعزيز .. اول شي انحرجت تفتحه قدامهم بس صارت كل الاوراق مكشوفه سمت بالله وفتحت الايميل وقرو اللي فيه
((سلام عليكم وريف
الظاهر ربي مو كاتب لي الفرحه
انا ماراح ادخل النت ابد..
انتي طيبه وتستاهلين كل خير
الله يرزقك باللي يستاهلك.. تأكدي اني ماحبيت ولا راح أحب الا وريف
اتمنى تسامحيني عاللي صار مني
اخوكـ/عبدالعزيز))

وريف مو ناقصه شي يزيد عليها
نزلت دموعها اللي عارفه طريقها زين: ماقلت لكم كل شي احبه يضيع مني....آآآآآآآآآآآآه
لمياء حضنت وريف تهديها
لميس حبت تغير الجو : بنات اليوم صارت معجزه
وريف ماردت
لمياء: وش صار؟
لميس: عبدالرحمن يتكلم بجديه خخخخخخ
لمياء: غريبه
لميس قلبها عورها : يسأل عن وريف
وريف ابتسمت : الله يسلمه ويسلمكم.. بنات ابي اتصل على فجر واحشتني مره
لمياء مدت لها الجوال: خوذي كلميها وانا ولميس بنطلع ننتظرك تحت عالقهوه
وريف ابتسمت : طيب
دقت على فجر اللي ناظرت بالرقم الغريب ماردت اول شي.. رجع يرن..
عبدالعزيز اللي كان يفرجهم على صور بريطانيا : مين اللي يدق
فجر: ما ادري رقم غريب
عبدالعزيز: تبيني أرد عليه؟؟
فجر : لالا يمكن من صاحباتي اششششش ابرد
ردت فجر وهي ساكته وتكلمت وريف: الووووو
فجر : مين؟؟
وريف: انا وريف
فجر تغيّر صوتها : هلا
وريف: شلونك ؟؟ شخبارك؟؟
فجر: بخير
وريف: فجر اش فيك تعبانه؟؟؟
فجر خنقتها العبره: انا؟؟ وش أهمك فيه؟؟؟
وريف انصدمت : وش هالحكي؟
قامت فجر من عند اهلها
وريف: فجر اش فيك؟؟؟
فجر بكت : ماا ادري من اللي وش فيه .. ماتلاحظين نفسك انتي؟؟ وين وريف اللي كانت كل يوم تكلمني؟؟؟ وين وريف اللي ماترتاح الا لما تكلمني ..من يوم عرفتي بنات عمك نسيتيني.. من يوم اعتذرتي عن الكورس انقطعتي عني.. تتذكرين اخر مره شفتك فيها؟؟؟ بالمستشفى
وريف مصدومه من الكلام.. هي مو ناقصه أي شي يزيد عليها
قفلت الجوال بهدوء .. حتى الدمع مل منها
لبست جلالها اللي اعطتها اياه لمياء ونزلت لهم مكسورة الخاطر
فجر عصبت من حركة وريف .. ليش ماترد علي؟؟ ليش تقفل بوجههي؟؟؟ رجعت وهي زعلانه
عبدالعزيز لاحظ اخته متضايقه
عبدالعزيز: فجوره
فجر: نعم
عبدالعزيز تأكد من الرد انها زعلانه من شي: تعالي معي لغرفتي نرتب الاغراض
فجر مالها خلق بس عشان خاطر أخوها قامت
دخلت وراه الغرفه
قام عبدالعزيز وقفل الباب : وش فيك؟
فجر ارتبكت : امم وش فيني يعني؟
عبدالعزيز : مين اللي كان عالجوال؟
فجر دمعتها نزلت : صديقة عمري
عبدالعزيز : وش فيها؟؟
فجر: تخيل ياعزوز كانت توأم روحي .. كل ساعتين تتصل علي واتصل عليها ..وبالفتره الأخيره تغيرت علي.. ماتتصل .. ولما أتصل عليها ماترد علي..
عبدالعزيز : وانتي وش دورك؟؟؟ اذا صديقة عمرها وما عذرتيها
فجر: تخيل قبل شوي اول ماعاتبتها قلت لها وينك قفلت بوجهي.. قلت يالله ماعليه هي غاليه ولازم اتحمل رجعت ادق عليها ماترد علي
عبدالعزيز : امممم يمكن عندها ظروف
فجر: لو عندها ظروف كان قالت لي
عبدالعزيز: يمكن ماتقدر تقولك
فجر: مستحيل... اقولك صديقة عمر يعني أي شي يضايقها تقول لي..
عبدالعزيز: اممم هي غلطت بس تحمليها عشان العشره اللي بينكم اتركيها فتره تراجع نفسها
فجر: لي اللحين كم شهر تاركتها تراجع نفسها .. انا اللي اتصل .. انا اللي أسأل .. انا الي ازورها وهي ولا همها
بهاللحظه رن جوال فجر مسج
عبدالعزيز: شوفي يمكن هي مرسله لك
فجر: لحظه
فتحت فجر المسج كان من نفس الرقم الغريب وريف تقولها عاللي صار لها كله
فجر طلعت عيونها ودموعها صارت سيول
عبدالعزيز خاف: فجر وش فيك؟؟
فجر مارد على اخوها حضنته وقامت تبكي من قلب..
عبدالعزيز يهز فجر : وش السالفه
فجر: ظلمتها ظلمتها
عبدالعزيز : ليش؟؟
فجر: البنت عندها ظروف صعبه صعبه صعبه وانا صديقة عمرها ماوقفت جنبها ... اكره نفسسسسسسسسسي
عبدالعزيز يهديها : لا تكرهين نفسك ولا شي بالعكس هي اللحين بتعرف اش كثر تحبينها وتحرصين على انها تواصلك وهذا من غلاتها واذا ودك تزورينها اوديك لها
فجر: والله؟؟؟؟
عبدالعزيز: ايه والله
فجر بتردد : بس انت تعبان
عبدالعزيز : وش قالولك جاي على حصان من بريطانيا متى بتروحين بس؟
فجر: اللحين
عبدالعزيز توهق ماتوقع انها بتروح اللحين : اممم طيب يالله البسي عباتك
اتصلت فجر على جوال وريف ماترد .. رجعت اتصلت على الرقم الغريب اللي اتصلت لها وريف منه
ردت لمياء: نعم؟؟
فجر: اممم سلام عليكم ممكن وريف
لمياء: آآ طيب ((اعطته وريف))
وريف بتردد : هلا
فجر: وريف عادي لو اجيك اللحين
وريف استانست من قلببببب : بتجين؟؟؟؟؟
فجر: اذا مايسبب لك احراج
وريف: لا بالعكس عمي بيفرح لي
فجر: زين اذا قربنا من منطقتكم اتصل لك تدلين لنا البيت
وريف: اصلا البيت سهل ما يضيع
فجر: زين زين باي

عبدالعزيز كان بالسياره ينتظر نزلت له فجر تركض مع الباب
عبدالعزيز : لاعاد تعودينها تخليني متنقع بالشمس
فجر: اسفه
عبدالعزيز: تعرفين بيتها؟؟
فجر: لا اذا قربنا اتصل عليها تدلنا
حرك عبدالعزيز

البنات لبسو وكشخو
بعد نص ساعه دخل عبدالعزيز بسيارته للحديقه منبهر من شكل الحديقه
وقفت سيارته عند باب البيت نزلت فجر ودخلت داخل شافت وريف واقفه عند الباب داخل حضنتها من قلبها
فجر وهي للحين حاضنه وريف: سامحيني
وريف: اوووص ماصار شي
فكو بعض وهم مبتسمين وسلمت فجر عالبنات وطلعو لغرفة لمياء وريف كانت تبكي وهي تتكلم عن موقفها مع أمها
لميس: وريف عندي فكره
وريف: وش هي؟
لميس: الللحين زياد بالمعسكر صح عشان النهائي؟؟
وريف ضاق صدرها من طاريه : ايه صح
لميس: وش رايك نروح نجيب امك؟؟
لمياء: بس خوف
وريف: صححح والله فكره
لميس: لا خوف ولا هم يحزنون من مين بنخاف يعني من شادن ولا من العجوز امها
وريف: وخالي بعد مو موجود هو شهر هنا وشهر برا
لميس: انا اللي بوقف لهم ماعليكم بس تروحون معي؟؟
وريف: اكيد ابروح بشوف أمي حتى جوال ماعندها
لمياء : بس أخواني وعيال اعمامي كلهم رايحين
لميس: وين رايحين؟؟
لمياء: رايحين كشته مابيرجعون الا بعد يومين
وريف مسكت راسها
لميس: اوكي نروح مع راجو
لمياء: راجو مو هنا ودا صبا لرغد ومابترجع الا
لميس: اووووه ميب حاله ذي
فجر تدخلت : طيب عندي حل
وريف: وشهو؟؟؟
فجر: تروحون معي؟؟
لمياء: لا عيب
وريف: احراااج
فجر: لا عيب ولا احراج أبقول لأخوي اننا رايحين نجيب امك لانها راحت زياره ومافيه أحد يجيبها
لميس: مايزعل؟؟
فجر: لا طيوب مايقول شي
لميس تحمست : يالله البسن عباياتكم
وريف: بس..
لميس: لاتبسبسين .. تبين تشوفين أمك؟؟
وريف بإندفاع : أكيد
لميس: اجل قومي
لمياء: بس اذا خلصت المباراه وش بيسوي زياد
لميس عصبت : وانتي ماهمك الا زياد
لمياء انصدمت من الكلمه ماردت وخصوصا هالجمله انقالت قدام فجر الغريبه
وريف حست بتوتر الموقف: يالله البسو العبايات
فجر طلعت من الغرفه اتصلت على عبدالعزيز
عبدالعزيز اللي ميت من التعب يبي يرجع ينام: هاه خلصتي؟؟
فجر: عزوز سامحني بس البنت امها راحت تزور وحده وماعندها أحد يجيبها
عبدالعزيز بخيبة امل : يعني؟؟؟
فجر: يعني ممكن نوديها نكسب فيها أجر
عبدالعزيز عصب : ياربييييييييييييه انا سواق ابوكم انا .. يالله اللحين اجي اخذكم انزلو لي ولا تتأخرون
فجر: طيب لا تعصب

قفلت فجر دخلت للبنات للغرفه عشان ينزلون كلهم تحت
لمياء اتصلت على ابوها تستأذن انهم يروحون بس ماجابت له سيره على اللي ناويين يسوونه

طلعو البنات من الباب ..
وريف: فجر من ذا؟؟
فجر: ماقلت لك عزوز رجع
وريف: الحمد لله على سلامته
فجر: الله يسلمك يارب

ركبت فجر قدام جنب أخوها اللي يحاول قد مايقدر يبين طبيعي عشان خاطر فجر
ركبت وريف ولميا ولميس ورا
وحرك عبدالعزيز السياره

قربو من الحي وكانت فجر تدل أخوها..
وريف كانت دموعها أربع أربع كل ماتقترب من هالبيت كل مايزيد الضغط على قلبها كأن أحد جالس يخنقها ماحست بنفسها إلا فاتحه القزاز
عبدالعزيز: المكيف مايبرد؟؟؟
وريف ماردت كانت تبي تشم هوا .. بس صوت تنفسها العالي وكانت تشهق بالتنفس
فجر عرفت ان وريف تبكي بصوت مخنوق.. لميس اللي صداعها بيذبحها ضغطت على يد وريف
وريف همست للميس: اوعديني
لميس: اوعدك بس بإيش؟؟
وريف: ماتتخلين عني
لميس عرفت ان وريف قاعده تستمد قوتها منها : اوعدك .. اوعدك
وزادت من ضغط يدها على وريف
وقف عبدالعزيز بعد ما وصل البيت
ناظرت لمياء دورت سيارة زياد مالقتها : مي موجوده السياره
لميس: يالله انزلي
وريف: لااا انزلي معي
لمياء: كلنا بننزل .. انزلي يالله
كحت وريف كان صوتها مبحوح وهذا نتيجه من كتمها لصوت بكاها طول ماهي بالسياره
نزلو وريف ولميس ولمياء
عبدالعزيز مو فاهم شي بس ما في حاله يفكر من النوم
فجر بودها تنزل مع وريف بس عيب هي وش دخلها
وريف تسندت على لميس
لميس تدور احد تتسند عليه بس تحملت عشان ماتحس وريف انها تعبانه
لمياء كانت خايفه بس دام لميس معهم متطمنه شوي
دقت الجرس
انفتح الباب بعد ماقالت لميس: لا تناظرون احد ولا تردون على احد سيده على خالتي
دخلو الثلاث شبه يركضون كانو متغطين
طلعو مع الدرج واللي فتحت الباب تركض وراهم
وريف رغم تعبها كانت اول وحده تركض لمياء الثانيه .. لميس التعبانه كانت الثالثه فجأه حست بالي تمسكها من طرحتها
لميس لفت وجهها شافت شادن شهقت ..
كان شكلها يخرع
مو مرتب تحت عينها سواد.. شعرها مبعثر على وجهها
وريف ولمياء دخلو داخل
وريف طاحت على رجل امها تبوسها
لمياء: وريف مو وقتك قووومي يالله
شالوها وحطوها عالكرسي

شادن بعد ما استوعبت اللي يصير راحت تركض للتلفون
لميس عرفت انها بتتصل على زياد وطارت على الغرفه
لميس: بنات بسرعه زياد جاي
وريف لطمت خدها: ياويلي ياويلي
لميس : مايقدر يسوي شي
دفو الكرسي ونزلو مع الممر المخصص لأم وريف جنب الدرج طلعو ند باب الشارع
زياد كان طالع برا مع اصحابه
اول ما اتصلت له شادن ترك صاحبه بالكوفي وركب السياره وحرك عالبيت
عبدالعزيز يوم شاف اللي معاهم مقعده نزل وفتح شنطة السياره
والبنات شالو ام وريف وحطوها بالسياره وعبدالعزيز أخذ الكرسي وحطه بالشنطه
وريف: فجر قولي لأخوك يمشي بسرعه زياد جاي
فجر شهقت ونزلت: عزوز بسررررررررررعه
ركب عبدالعزيز ورجع على بيت ابو عبدالرحمن
ناظر بالمرايه عشان يشوف الطريق وراه وبالصدفه طاحت عينه عالبنات ورا كانت وحده حاضنه العجوز اللي كانت بالكرسي وشكلها تبكي
ووحده ماسكه راسها والثانيه تناظر بالشارع
وصلهم البيت ونزل لهم الكرسي المتحرك
وريف ولميس ساعدو ام وريف انها تجلس عالكرسي
ولميس تمددت جنبها
لمياء شهقت : هيييييييي وش فيها؟؟؟
وريف حطت يدها على راسها ونزلت لمستوى لميس تناظر بها .. بس لاحياة لمن تنادي
لمياء: وريف دخلي أمك داخل وانا بشوف اش فيها
عبدالعزيز دق قلبه للإسم.. ابتسم بيأس
وريف: طيب
دفت وريف امها بالكرسي دخلتها داخل
ولمياء تحاول تصحي لميس .. عبدالعزيز تفشل من وقفته ودخل السياره وفجر ولمياء شالو لميس بصعوبه ..
اول ما وصلو الباب سمعو صوت سياره تفحط ناظرت لمياء .. توقعها صح
هذا زيــــــــــــــــــــــــــــــــــــــــــــــــ اد
لميس مغمى عليها ... ووريف داخل ماتقدر تطلع

االرواية روووووووعة

دخيلج كمليها بسرعة ما اقدر اصبر